日圓暴瀉 港人日本搵銀潮

日本央行出其不意擴大量化寬鬆（QE）規模，狂印銀紙企圖打救奄奄一息的經濟，刺激日股爆升，一度衝上一萬七千點近年新高，本港散戶、基金甚至從未入市炒過日本股樓的市民，都相當亢奮。

日本市場愈燒愈旺，加上六年後東京奧運效應和憧憬當地開賭，港人近年掀起一股炒日本資產搵銀的熱潮。有中產沽出西半山物業後，一口氣豪掃六個日本單位做收租佬；有「日本通」炒東瀛股票，勁賺兩倍。

隔山買牛有如賭局，並無必賺的道理，日圓匯價隨時未見底，港人炒日本股樓，離場時將日圓換回港元，分分鐘「賺價蝕匯率」。投資者戒之在貪，淘金前宜先三思，慎防接下火棒。

上月底，日本央行突然宣布加碼狂印銀紙，日圓匯價應聲下挫，兌港元終告失守「七算」大關。港人愛到日本「血拼」，眼見日圓匯價又再狂瀉，大批市民怕執輸，紛紛湧到兌換店「搶錢」。

上周五中午，記者到「名店」百年找換店觀察，只見輪候人龍排到樓下，相當誇張。周先生一邊在店外點算剛兌換的日圓，一邊興奮說：「之前十算和八算都換過，今次當『溝貨』，遲些去日本旅行實用得着！」

其實何止跟風搶日圓，有見於日本政府出盡法寶搞起經濟，不少港人為免錯失掘金機會，紛紛湧到日本市場尋寶。當中不少人貪日圓愈來愈平，日本樓銀碼又細，加上租金回報動輒達七、八厘，於是膽粗粗追捧日本樓。

火燎森瞓身推介日本樓，認為要捉緊百年一遇的好機會，堅信日本資產會繼續升值。